O Futuro das Explotacións Gandeiras, Xestión Dixital e Enerxía Intelixente: Competencias dixitais para unha granxa máis autónoma e eficiente

13/11/2025

A xestión dunha explotación gandeira require hoxe manexar información, trámites e ferramentas dixitais de maneira habitual. Desde a presentación da PAC ata o control documental, a comunicación co persoal técnico ou a protección dos datos da granxa, a competencia dixital converteuse nunha parte esencial do traballo diario no sector.

O curso de competencias dixitais do programa “O futuro das explotacións gandeiras: Xestión Dixital e Enerxía Intelixente” está deseñado como un itinerario completo, progresivo e eminentemente práctico. A formación estrutúrase en módulos que permiten comprender primeiro o contexto da dixitalización agraria e avanzar, paso a paso, cara ao uso real das ferramentas que xa forman parte da actividade cotiá das explotacións.

Ao longo do curso trabállase a tramitación electrónica agraria, incluíndo o uso das sedes electrónicas, a xestión dixital da PAC e os principais rexistros obrigatorios. Tamén se afonda na organización eficiente da documentación, no uso da nube, nas ferramentas básicas de tratamento de datos e na aplicación práctica de solucións dixitais que melloran a planificación, o control de recursos e a comunicación profesional.

Un bloque específico está dedicado á ciberseguridade e á protección da información da explotación, un aspecto cada vez máis relevante nun contexto no que os datos teñen un alto valor técnico, económico e legal. O curso aborda riscos habituais, boas prácticas e medidas sinxelas para garantir un uso seguro da tecnoloxía no ámbito rural.

A formación complétase cunha parte práctica final, na que cada participante pode aplicar os coñecementos adquiridos á súa propia realidade, elaborando un plan dixital básico de xestión da explotación e resolvendo trámites simulados. O obxectivo é que a capacitación non quede só no coñecemento, senón que se traduza nunha mellora real da autonomía, da organización e da eficiencia da granxa.

Desde Unión Leiteira Galega, en colaboración coa Deputación de Pontevedra, apóstase por unha formación útil, rigorosa e adaptada ao sector gandeiro galego, pensada para acompañar ás persoas gandeiras no proceso de transición dixital e reforzar a súa capacidade para afrontar os retos presentes e futuros do rural.

Para inscribirse nestes cursos de formación ou obter mais información, pode contactarnos a través do correo electrónico oplulega@gmail.com ou chamando ao número 981 52 43 29.