O Futuro das Explotación Gandeiras, Xestión Dixital e Enerxía Intelixente: Control intelixente: tecnoloxía para un sector máis competitivo

31/10/2025

O control técnico dos principais procesos produtivos é unha das claves para avanzar cara á modernización do sector gandeiro. O uso de sensores, sistemas de monitorización e plataformas de seguimento en tempo real permite identificar problemas antes de que afecten á produción e mellorar o benestar animal. Esta capacidade de vixilancia continua converte as explotacións en espazos máis seguros, eficientes e sostibles.

Nesta terceira fase, o proxecto centrarase no desenvolvemento e divulgación de sistemas intelixentes de control. A implantación destas tecnoloxías permite unha xestión máis precisa da enerxía, da alimentación, da climatización das naves e dos indicadores produtivos, favorecendo unha produción sostible e eficiente. Ademais, abordarase o uso de ferramentas de análise de datos que permitan avaliar o rendemento de cada proceso e mellorar a planificación a longo prazo.

O obxectivo é que as granxas galegas incorporen progresivamente estas ferramentas, facilitando a transición cara modelos de xestión baseados en datos, que melloren a toma de decisións e a competitividade do sector. A automatización e o control dixital non substitúen o coñecemento humano, senón que o fortalecen, permitindo que o traballo gandeiro sexa máis técnico, eficaz e previsible.

A Unión Leiteira Galega (ULEGA), en colaboración coa Deputación de Pontevedra, aposta por impulsar a modernización do sector gandeiro a través da formación, a innovación e a dixitalización. O proxecto “O futuro das explotacións gandeiras: Xestión Dixital e Enerxía Intelixente” inclúe cursos online, asesoramento técnico e accións divulgativas dirixidas a mellorar a eficiencia produtiva, o aforro enerxético e a sustentabilidade das explotacións da provincia de Pontevedra.

A través destas actividades, búscase que gandeiros e gandeiras dispoñan das ferramentas necesarias para facer das súas granxas espazos máis modernos, competitivos e respectuosos co medio ambiente. ULEGA continúa así o seu compromiso cun rural galego preparado para os desafíos do futuro, combinando coñecemento, tecnoloxía e sostibilidade nun mesmo camiño.

Para inscribirse nestes cursos de formación ou obter mais información, pode contactarnos a través do correo electrónico oplulega@gmail.com ou chamando ao número 981 52 43 29.