O Futuro das Explotación Gandeiras, Xestión Dixital e Enerxía Intelixente: Vixilancia técnica e control funcional para mellorar a eficiencia das granxas

09/10/2025

A vixilancia técnica e o control funcional convertéronse en ferramentas clave para mellorar a eficiencia e a sustentabilidade das explotacións agro-gandeiras. Nun contexto no que pequenos desaxustes poden ter un impacto directo sobre a produtividade, o benestar animal ou os custos, resulta fundamental contar con rutinas de control que permitan observar, medir e avaliar o funcionamento real dos procesos produtivos. A implantación destes sistemas facilita a detección temperá de problemas e contribúe a unha mellora continua da actividade diaria na granxa.

Neste marco, o curso “O futuro das explotacións gandeiras: Xestión Dixital e Enerxía Intelixente”, impulsado pola Unión Leiteira Galega (ULEGA) coa colaboración da Deputación de Pontevedra, incorpora unha formación específica centrada na vixilancia técnica e no control funcional das explotacións. Nesta parte do curso, introdúcense os fundamentos do control técnico, a identificación das variables clave nos procesos produtivos e a importancia do rexistro sistemático de datos ambientais, produtivos e sanitarios como base para unha xestión máis precisa e sostible.

Ao longo dos módulos abórdanse contidos relacionados coa análise de datos e a interpretación de tendencias, a utilización de tecnoloxías sinxelas e accesibles de medición, así como a monitorización das condicións ambientais nas instalacións gandeiras. Trátanse aspectos como o control da temperatura, humidade, ventilación, iluminación ou calidade do aire, e o seu impacto directo sobre o benestar animal e o rendemento produtivo. Ademais, preséntanse métodos para identificar desviacións produtivas, establecer indicadores de alerta temperá e aplicar protocolos de actuación ante incidencias.

A formación complétase coa aplicación de solucións correctivas e plans de mellora continua, incorporando ferramentas de análise de causas e criterios técnicos para a toma de decisións. Tamén se traballa o control do benestar animal como parte inseparable da calidade do proceso produtivo, así como a análise de casos reais de implantación de sistemas de vixilancia técnica en granxas galegas. Esta aproximación práctica permite trasladar os coñecementos adquiridos á realidade das explotacións, reforzando unha xestión baseada na observación, no control e na mellora constante.

Para inscribirse nestes cursos de formación ou obter mais información, pode contactarnos a través do correo electrónico oplulega@gmail.com ou chamando ao número 981 52 43 29.